Trajtimi i togfjalëshit të qëndrueshëm në tekste të gjuhës shqipe të ciklit 9-vjeçar

Abstrakti

Synimi i këtij punimi është të analizojë togfjalëshat e qëndrueshëm (frazeologjikë dhe jofrazeologjikë) që nxënësit e shkollës 9-të vjeçare hasin ndërsa praktikojnë aftësinë e të lexuarit në tekstet shkollore të gjuhës shqipe. Meqenëse togfjalëshat e qëndrueshëm nuk kanë kuptim të fjalëpërfjalshëm, ata paraqesin vështirësi reale për nxënësit e rinj. Nëpërmjet këtij punimi, synojmë të shqyrtojmë ndërtimin gramatikor dhe kuptimin specifik të tyre, klasifikimin dhe shpeshtësinë e përdorimit në tekstet përkatëse, shkallën e vështirësisë në të kuptuarit e tyre dhe vëmendjen që u kushtohet nga hartuesit e teksteve mësimore. Ne do të përpiqemi të japim disa sugjerime mbi klasifikimin dhe përdorimin e tyre, faktorët sociolinguistikë dhe gjuhësorë që duhet të merren parasysh në trajtimin e tyre.