Përdorimi i konektorëve logjikë në tekstin argumentues

Abstrakti

Në këtë punim kemi parë përdorimin e konektorëve dhe rolin që ata luajnë në tekstin argumentues. Siç e dimë, konektorët janë elemente lidhëse ndërmjet fjalive ose grupeve të fjalive. Me anë të përdorimit të konektorëve, në tekst të dhënë vendoset një lidhje semantiko-logjike midis fjalive apo thënieve të përdorura. Gjithashtu duhet të themi që konektorët nuk janë lidhëza. Lidhëzat janë trajtuar nga gramatika tradicionale në planin përtej fjalisë, ndërsa konektorët shihen, në këndvështrimin e gjuhësisë së tekstit, si mjete lidhëse në planin e ligjërimit. Në gjuhën shqipe, për konektorët ka disa studime të mirëfillta, në të cilat edhe jemi mbështetur në punimin tonë. Punimi ynë ka si synim të studiojë përdorimin e konektorëve në diskurset politike, sesi përftohen këta konektorë dhe ç‘rol luajnë në diskurs. Ky punim është pjesë e temës së doktoraturës dhe, si tekste argumentuese, kemi zgjedhur të trajtojmë diskursin politik. Diskursi i zgjedhur është fjalimi i Fan Nolit mbajtur në Lidhjen e Kombeve, në Asamblenë e Pestë të Lidhjes, më datë 10 shtator 1924. Në këtë punim do të paraqesim të gjithë konektorët e përdorur dhe rolin që luan secili prej tyre në këtë diskurs.